Point of order, Speaker: If you seek it, you will find unanimous consent to allow me to speak for 10 minutes regarding the historic significance of recognizing Indigenous languages in this Legislature.

ᒪᐘᐨ ᓂᒥᓄᐍᐣᑕᐣ ᐁᐸᐦᑭᓂᑯᔭᐣ ᒋᐊᓂᔑᓂᓃᒧᔭᐣ ᐅᒪ ᑭᐦᒋᐘᑲᐦᐃᑲᓂᐣᐠ

ᐅᑵᓄᐘᐠ ᑫᔭᔭᒥᐦᐃᑕᒪᐘᑿ ᐍᑎ ᑮᐍᑎᓅᐣᐠ ᑲᐏᐣᒋᓭᐘᐨ ᐱᒼᐸᐦᑐᐏᓂᐣᐠ

ᑲᐏᓃᐣ ᐅᑰ ᐁᐦᑕ ᐃᑵᓅᐘᐠ ᑮᐍᑎᓅᐣᐠ ᐱᒼᐸᐦᑐᐏᓂᐣᐠ ᑲᐏᐣᒋᓭᐘᐨ

ᑲᐦᑭᓇ ᐊᓂᔑᓂᓄᐘᐠ ᒥᓯᐍ ᐅᒫᑲᒥᐠ ᐅᐣᑕᕒᐃᐅ

ᑭᑭᑫᐣᑖᒥᐣ ᐁᔮᐠ ᐊᓂᔑᓂᓃᒧᐏᐣ ᐊᔑᔾ ᐁᓂᐘᓂᒋᑲᑌᐠ

ᒥᔒᐣ ᐅᐦᑭᑑᑕᐣ ᐁᐦᐊ ᐅᑭᒪᐏᐣ ᐁᑲ ᒋᔭᐸᒋᒋᑲᑌᐠ ᐊᓂᔑᓂᓂᒧᐏᐣ

ᐅᑵᓄᐘᐣ ᐃᓑᑯᓄᑲᒥᑰᐣ ᑲᑭᐏᔑᐦᑐᐘᐨ

ᒥᔒᐣ ᐊᔭᐘᐠ ᐆᒪ ᑲᑭ ᒪᓀᓂᒥᐣᑢ ᐁᐏᐍᒥᐦᑎᑯᔑᒧᐘᐨ

ᒥᔒᐣ ᐆᒪ ᐊᔭᐘᐠ ᐁᑮ ᑲᓯᓂᐣᑤ ᐆᒪ ᓲᐸᐣ ᐁᔭᐸᑎᓯᓂᐨ ᐁᐊᓂᔑᓂᓃᒧᐘᐨ

ᒥᔒᐣ ᑲᔦ ᐊᔭᐘᐠ ᐆᒪ ᑲᑭᒫᓀᓂᒥᐣᑢ ᐁᐸᐦᑭᑌᐏᐣᑢ ᐁᑭᐦᒋᐊᓄᐦᑭᐦᐃᐣᑢ ᐁᔭᓂᔑᓂᓃᒧᓇᓄᐘᐣᐠ

ᓂᒥᓄᐍᐣᑕᐣ ᑕᓑ ᐆᐅᐦᐍ ᑲᑭᔑᑲᐠ ᐅᐍ ᑲᔭᔭᒥᔭᐣ

ᑫᑲᐟ ᐅᑯ ᓂᑎᓂᒪᐣᒋᐦᐅ ᐁᐘᓂᑑᑕᒫᐣ ᐁᒪᒪᓂᔭᐣ ᓂᑎᓀᑕᐣ ᐅᐦᐅᐍ ᒣᑿᐨ ᑲᑲᑭᑎᔭᐣ

ᒥᑵᐨ ᓂᑎᓈᐠ ᑲᐦᑭᓈ ᑭᓇᐚ ᐆᒪ ᑲᔭᐱᔦᐠ ᐍᑎ ᑲᐃᔑᔭᐱᔦᐠ ᐁᒁ ᒥᓈ ᐆᒪ ᑲᐃᔑᔭᐱᔦᐠ

ᒥᑵᐨ ᑲᐦᑭᓈ ᑭᑎᓂᓈᐚ ᐅᐍ ᑳᐃᔑᐏᒋᑳᐸᐏᑕᐏᔑᔦᐠ

ᒫᐘᐨ ᑭᐦᒋᓀᑕᑿᐣ ᐅᐦᐅᐍ ᑲᑐᑕᒪᐣᐠ

ᐅᑵᓄᐘᐠ ᑲᔦ ᐊᓂᔑᓂᓄᐘᐠ ᑲᑲᓇᐘᐳᐚᐨ ᒫᐘᐨ ᑭᐦᒋᓀᐣᑖᑿᐣ

ᐅᑿᓄᐘᐠ ᑲᔦ ᐊᔭᐘᐠ ᑲᑭ ᐱᒧᑐᐘᐨ ᓂᑎᔑᑭᔑᐍᐏᓂᓈᐣ

ᒥᑵᓄᐘᐠ ᓂᑫᓃᐣ ᑭᔮᐸᐨ ᑲᐅᐣᒋ ᐊᓂᔑᓂᓃᒧᔭᐣ

ᐊᐍ ᑲᔦ ᓂᒪᒪ ᑲᔭᐱᐨ ᓂᑭᒫᒪᒋᐏᓂᐠ ᐁᐹᐸᒥᔭᔭᐣᐠ ᐸᑿᒋᔭᐦᐃᐣᐠ

ᒥᔭᐍᑎ ᑭᔭᐱᐨ ᑲᐅᐣᒋ ᐊᓂᔑᓂᓃᒧᔭᐣ ᐊᐦᐊᐍᑎ

ᐁᑿ ᑲᑭᓈ ᐅᑵᓄᐘᐠ ᑷᑕᑭᔭᐠ ᐆᐢᑳᑎᓴᐠ ᐊᐘᔑᔕᐠ ᑭᑐᓯᓯᒥᓇᓇᐠ ᐊᒥᑵᓄᐘᐠ ᑫᐏᓇᐚ

ᒋᔭᓂ ᑭᐦᑫᓇᑕᒧᐘᐨ ᒋᔭᓃᑭᐦᑫᑕᒧᐘᐨ ᒋᓂᐦᑖ ᐊᓂᔑᓈᐯᒧᐘᐨ

ᑫᑭᓈᐘ ᑲ ᐊᐣᑐᑕᒣᐠ ᐆᒪ ᒥᓯᐍᑳᒥᐠ

ᑭᐦᑭᓅᐦᐊᒪᐏᐠ ᒋᓂᐦᑖ ᐊᓂᔑᓂᓃᒧᐘᐨ ᒋᓂᑕ ᐊᓂᔑᓇᐯᒧᐘᐨ ᑭᑕᔭᓄᐚ

ᐊᔕᔾ ᑫᑳᐟ ᑭᑢᓯᔭᐦᑭ ᓂᑫᓂᐣ ᐆᒪ ᑲᑭᒪᑕᐱᔭᐣ ᐁᐏᑕᐱᒥᓇᑯᐠ ᐆᒪ

ᓂᔑᐱᒧᑲᓇᑲ ᐅᑖᓇᐠ ᑭᐦᒋᓇᒣᑯᓯᐱᐣᐠ ᓂᑭᔕ

ᐅᐍᔖᓑ ᓂᑭ ᓇ ᐯᔑᐠ ᑭᒉᐦᐋ ᐅᐍ ᓂᑭᓈ

ᐅᐍ ᐁᐏᐦᑐᑕᒪᐣ ᐁᐏᐊᓄᔑᓂᓂᒧᔭᐣ ᐆᒪ ᑭᐦᒋᐘᑲᐦᐃᑲᓂᐠ

ᐊᐦᐸᐣ ᑲᒫᒋᐊᔭᒥᐦᐊᐠ ᑭᓂᓯᑐᑕᐏᐣ ᐊᔕᔾ ᐁᓂᐘᓂᐦᑐᔭᐣ ᑭᑎᔑᑭᔑᐍᐏᐣ

ᐁᓂᑯᐠ ᐊᐦᐸᐣ ᑲᑭᒪᒐᔭᒼᐸᐣ

ᒥᐍ ᐁᐦᑐᒋᑫᒪᑲᑭᐣ ᐅᑵᓄᐘᐣ ᑐᐦᑲᓇᐣ ᑭᐦᒋᐘᑲᐦᐃᑲᓇᐣ ᐁᑲ

ᐁᓂᐘᓂᐦᑐᔭᐣ ᓂᑫᓂᐣ ᑲᑭᓇᓄᐦᑭᔭᐣ ᑭᑢᓱ ᐁᓂᐘᓂᐦᑐᔭᐣ ᓂᑭᓂᐢᑐᐦᑖᐠ

ᓂᑭᓂᐢᑐᐦᑖᐠ ᐃᐍ ᐁᐘᓂᐦᑖᐘᐠ

ᒥᑵᐨ ᔖᓑ ᓂᑎᓀᐣᑕᐣ ᐊᐦᐸᐣ ᐅᐍ ᑲᐸᑭᑎᓂᑯᔺᐣ ᑭᔭᒼ ᐅᑯ ᒋᔭᓂᔑᓂᓃᒧᔭᐣ ᐅᐦᐅᒪ

ᒫᐘᐨ ᓂᒥᓄᐍᑕᐣ

ᑫᑭᔐᑊ ᑲᐘᓂᓑᑲᔭᐣ ᐅᒪᒥᓇ ᐁᐅᐣᒋ ᐱᒪᓯᓇᐦᐊᒪᑯᔭᐣ

ᐊᐦᐊ ᐅᑵᓄᐘᐠ ᓇᒣᑯᓯᐱᐃᓂᓃᐘᐠ ᑲᑭᑯᑢᓱᐘᐨ ᑲᑭ ᑭᐸᑿᐦᐘᑢᐸᐣ ᐆᒪ ᒣᑿᐨ 2008

ᒥᐍ ᐅᐍ ᑲᑭᔑᑲᓂᐠ ᐁᑭ ᓴᑭᒋᐦᐃᑢᐸᐣ ᐅᐍ ᑲᑭᔑᑲᓂᐠ ᒣᔾ 28

ᐯᔑᐠ ᐁᑎ ᐊᐱ ᐅᑭᒪᐦᑲᓇᐠ ᐅᓇᐦᔓᐍᐏᓂᓄᐘᐠ ᐆᒪ ᐱᑯ ᐊᐳᐘᐠ ᓂᐘᐸᒪᐠ ᐅᑯ

ᒥᐅᐍ ᑲᑭᔑᑲᓂᐠ ᐁᔭᐚᐨ ᐅᑕᐦᑭᒧᐚ ᐁᑲ ᐁᒥᑲᑕᒧᐘᐨ ᐅᑕᐦᑭᒧᐚ

ᐊᒥᐍ ᑲᐃᓀᐣᑕᒪᐣ ᐁᑿ ᑲᔦ ᒪᐘᐨ ᓂᒥᓄᐍᐣᑕᐣ ᐊᐦᐊ ᓂᒪᒪ ᐆᒪ ᑲᔭᐨ

ᐅᐍ ᑲᑎᐱᓑᑲᐣᐠ

ᐁᑿ ᑲᔦ ᓂᑐᐣᒋ ᒥᑲᐏᐣᑕᐚ ᓂᑕᑕ ᐊᔭᑐᐠ ᐅᓇᒋᑕᐣ ᐅᐍᑲᔭᓂᐠ ᐅᓇᒋᑕᐣ

ᐅᐦᐅᐍ ᔕᓑ ᑲᔦ ᓀᑲᐃᑭᐟ ᓂᑫᓂᐣ ᓂᑎᔑᐸᐦᑯᓭᐣᑖᐣ ᐅᒪ ᑲᑐᑕᒪᐣᐠ ᐆᒪ ᐅᐣᑕᕒᐃᐅ ᑲᐸᑭᑎᓂᑲᑌᐠ

ᐊᐣᔑᓂᓃᒧᐏᐣ ᑲᐸᑭᑎᓂᑲᑌᐠ ᐃᐍ ᓂᑎᓀᐣᑕᐣ ᑯᑕᑭᔭᐣ ᑭᐦᒋᐅᑭᒪᐏᑲᒥᑯᐣ ᐍᑎ ᒥᓯᐍᑲᒥᐠ

ᐆᒪ ᑲᓇᑕ

ᑫᐏᓇᐘ ᐅᐍᓂ ᐊᐦᐸᐣ ᒋᑐᑕᒧᐘᐨ

ᑫᐏᓇᐘ ᐃᐍᑎ ᐊᑕᐚ ᑲᔭᐳᐘᐨ ᑭᐦᒋᐅᑭᒪᐏᑲᒧᐠ ᑫᐏᓇᐘ ᒋᔭᐣᑕᒋᑫᐚᐨ

ᐊᒥᐍ ᐁᐃᔑᓇᑿᐠ ᐁᒪᒪᐤ ᑲᐸᐏᓇᓄᐘᐣᐠ ᐁᐏᑕᓄᐦᑭᒥᑐᓇᓂᐘᐣᐠ ᐁᑲ ᒋᐘᓂᐦᑐᔮᐣᐠ ᐃᓀᓄᐘᐣ

ᓂᑎᔑᓂᔑᐍᐏᓂᓇᐣ

ᒫᐘᐨ ᑭᒋᓀᐣᑕᑿᐣ ᑫᑯᐣ ᐃᐦᐃᐍ

ᐅᐍᑕᓑ ᓂᑲᐃᐦᑭᐟ ᒥᓇ ᑲᔭᓂᔑᓂᒧᔭᐣ ᐊᒥᒪ ᐁᐅᒋᓭᐠ ᓂᑕᓂᔑᓂᓃᐘᑎᓱᐏᓇᐣ

ᐅᐍ ᑲᔭᓂᔑᓂᓃᒧᔭᐣ ᐊᒥᒪ ᑲᐸᐸᒥᔭᔭᐣᐠ ᐊᐦᑭᑲᐣᐠ ᒥᐍ ᐁᐅᐣᒋ ᒥᓄᔭᔭᐣᐠ ᐃᐦᐃᐍ ᐊᐦᑭᑲᐣᐠ

ᒪᐘᐨ ᐅᑯ ᑭᐦᒋᓀᑕᑿᐣ ᐅᐦᐅᐍ ᐊᐸᐣ ᒪᓑᑲᐏᓯᐏᐣ ᐊᐸᐣ ᐊᓂᔑᓂᓄᐘᐠ ᐊᐦᐸᐣ ᐁᓂᒪᒪᐤ ᑲᐸᐏᐘᐨ

ᒥᐍ ᒋᔭᓂ ᐸᓯᑷᔭᐣᐠ ᐅᓴᒼ ᐊᔕᐃ ᑭᓄᐍᓑ ᑭᑿᑿᑕᐦᐃᑯᒥᐣ ᐃᑵᓄᐘᐣ ᐅᑭᒪᐏᓇᐣ

ᐅᑭᒪᐠ ᐏᑕᓄᐦᑭᒥᔑᔭᐣᐠ ᐏᑕᓄᑭᒧᐍᐣ ᐏᑕᓄᑭᒧᐍᔪᐠ ᐊᒥᐍ ᐁᐃᑭᑐᔭᐣ

ᐆᒪ ᒥᔑᐣ ᐊᓂᔑᓂᓄᐘᐠ ᐅᑕᓇᐠ ᑭᑭᑐᐘᐠ ᐁᑲ ᐏᐦᑳ ᐊᓂᔑᓈᐯᒧᐏᐣ ᒋᔭᒥᓇᓄᐘᐣᐠ ᐅᒪ ᑭᐦᒋᐘᑲᐦᐃᑲᓂᐠ

ᐁᐦᐊ ᐯᔑᐠ ᑭᑭᑐᐸᐣ ᑊᕒᐊᐣᐠ ᐱᕒᑎ ᐁᑭᓇᑲᓄᐸᐣ ᐅᒐᓑᑯᓂᒥᐣᐠ ᐁᐅᐣᒋᓭᐨ

ᑲᐏᓂᐣ ᐏᐦᑲ ᑭᑭᑐᐸᐣ ᒋᔭᓂᔑᓂᒧᓇᓄᐘᐣᐠ ᐅᒪ ᐘᑲᐦᐃᑲᓂᐠ

ᓄᐣᑯᒼ ᑕᓑ ᑲᑭᔑᑲᐠ ᐸᐦᑲᐣ ᐃᔑᓭ

ᐊᐦᐸᐣ ᓴᑫᐣ ᐁᐸᑭᑎᓂᑲᑌᐠ ᐅᐍ ᐃᔑᑭᔑᐍᐏᐣ

ᒥᐍ ᒪᐘᐨ ᐅᑯ ᒥᑵᐨ ᑲᐦᑭᓇ ᓂᑎᓇᐠ ᑭᒉᐦᐊᐠ

ᒥᑵᐨ ᑲᐦᑭᓇ ᓂᑎᓇᐠ ᐅᐢᑲᑎᓴᐠ

ᐍᒥᑎᑯᔑᐘᐠ ᑲᔦ ᐆᒪ ᑲᔭᐳᐘᐨ ᐅᑭᒪᐠ ᐃᐦᑵᐘᐠ ᐅᓑᑭᓂᑯᐘᐠ

ᒥᑵᐨ ᑲᐱᔕᔦᐠ ᐆᒪ ᑲᐱᓇᒋᑕᒣᐠ

ᐊᐦᐃ ᒥᐦᐃᒫ ᐁᐅᐣᒋ ᐅᐣᑎᓇᒪᐣᐠ ᒪᓑᑲᐏᓯᐏᐣ ᐅᐍ ᑭᔭᐸᐨ ᑲᐱᒪᐦᐃᐍᔭᐣᐠ ᐅᒪ ᐊᐦᑭᐣᐠ ᐃᐍ ᐁᐅᒋᓭᐠ ᐃᒪ ᓂᑎᔑᑭᔑᐍᐏᓇᐣ

ᐁᑿ ᑲᔦ ᓂᐘᐦᑯᒥᓇᐣ ᑲᐘᐦᑯᒪᔭᐣᐠ ᐱᒪᑎᓱᐏᓇᐣ ᑲᔭᒪᐣᐠ

ᐁᑿ ᐅᒪ ᐊᐦᑭᐣᐠ ᑲᔭᔭᐣᐠ ᒥᐱᑯ ᐁᐅᐣᒋᓭᐠ ᐅᐦᐅᐍ ᐃᔑᑭᔑᐍᐏᐣ

ᐃᐦᐃᐍ ᑲᔦ ᒋᒥᓄ ᐱᒪᑎᓯᔭᐣᐠ

ᒋᒥᓄ ᐏᑕᓄᐦᑭᒥᑎᔭᐣᐠ ᐅᒪ ᑲᐦᑭᓇ ᑲᔭᔦᐠ ᒪᐘᐨ ᑭᐦᒋᓀᑕᑿᐣ

ᐁᑿ ᒪᐘᐨ ᐅᑯ ᓂᐦᑭᒋᓂᑕᐣ ᑲᐸᑭᑎᓂᔑᔦᐠ ᒋᔭᓂᔑᓂᓃᒧᔭᐣ ᒫᐘᐨ ᓂᓇᓇᐦᑯᒼ

ᒪᐘᐨ ᓂᑭᐦᒋᓀᑕᐣ ᓂᑌᐦᐃᐣᐠ ᐁᑿ ᐆᒪ ᓂᑎᐯᓂᒪᑲᓇᐠ ᓂᐘᑯᒪᑲᓇᐠ ᑲᐦᑭᓇ ᐁᔭᐳᐘᐨ

ᑲᐏᐣ ᐃᑯ ᓇᐣᑕ ᓂᑭᔑᓂᐦᑲᑕᓯᐣ ᐁᓑᑲᒼ ᐊᐦᑯ ᐁᔭᔭᐣ ᐁᒧᔑᐦᐃᑯᔭᐣ ᐅᐍ ᑲᐃᔑᓭᐠ

ᒥᐍ ᐱᓇᒪ ᒥᓂᑯᐠ ᑕᐘᐨ ᑫᔭᔭᒥᔭᐣ ᐁᑿ ᒥᓇᐘ ᓂᑲᐃᑭᐟ

ᑭᐦᒋ ᒥᑵᐨ ᒥᑵᐨ ᑲᐃᔑ ᓇᑐᑕᐏᔑᔦᐠ ᑲᐃᔑ ᐸᑭᑎᓂᑯᔭᐣ ᒋᔭᔭᒥᔭᐣ ᐅᐍ ᒣᑿᐨ ᑲᑭᔑᑲᐠ

ᑭᐦᒋᑭᔑᑳ ᐅᐦᐅᐍ

ᑭᐦᒋ ᒥᑵᐨ

Applause.